مجدي الروبي يكتب.. (بالدااارجي)
مجدي الروبي يكتب..
(بالدااارجي)
دور المواطن في استخدام وسائل التواصل الاجتماعي خلال الحروب والكوارث
في الأوقات الصعبة مثل الحروب والنزاعات بيكون دور المواطن مهم جداً في حماية نفسه وحماية المجتمع البعيش فيه واحدة من الأدوات البقت متاحة لينا في الزمن الحالي هي وسائل التواصل الاجتماعي، واللي بقت تلعب دور كبير في نشر المعلومات. لكن كمان لازم نكون واعين للإيجابيات والمخاطر الممكن تجي من استخدامها، خصوصاً في زمن الحرب.
الإيجابيات
نشر المعلومات الحقيقية
المواطن الواعي بيقدر يستخدم منصات السوشال ميديا لنشر المعلومات الدقيقة حول الأحداث الحاصلة في مناطق النزاع. دي بتمكن الناس التانية من معرفة الحاصل واتخاذ القرارات الصحيحة.
دعم المجتمعات
الناس بتقدر تستخدم وسائل التواصل الاجتماعي للتضامن مع بعض ودعم المتضررين. سواء كان بالتوعية أو جمع التبرعات أو بس نشر رسالة دعم معنوية.
التوثيق
السوشال ميديا ممكن تكون أداة قوية في توثيق الجرائم والانتهاكات الحاصلة خلال الحرب ودي بتساعد لاحقاً في محاسبة المسؤولين عنها.
عدم الرد على المنشورات المضللة
واحدة من أكبر المشاكل الحاصلة في زمن الحرب هي انتشار الأخبار الكاذبة والمضللة. المواطن لازم يكون واعي وما ينجرف وراء أي خبر بجي في السوشال ميديا بدون ما يتحقق من مصدره الرد على الأخبار المضللة أو نشرها من غير قصد ممكن يساعد في انتشارها أكتر.
كيف نتعامل؟
تحري المصدر
لازم دايماً نتحقق من المصادر قبل ما نصدق أو نرد على أي منشور
ما ننشر أي خبر إلا بعد التأكد
لو ما متأكدين من الخبر، الأفضل ما ننشرو نهائياً
التبليغ عن المحتوى المضلل
لو شفت أي محتوى مضلل أو كاذب بلغ عنه مباشرة للمنصة المعنية عشان يوقفوا انتشاره
إعطاء معلومات للعدو مجانا
في أوقات الحروب في ناس عن قصد أو بدون قصد بتكون بتنشر معلومات حساسة زي إحداثيات سقوط الدانات أو تحركات العدو دي معلومات ممكن تُستخدم ضد المواطنين نفسهم، لأن الأعداء بيكونوا برضو متابعين وسائل التواصل الاجتماعي.
التعامل مع المعلومات الحساسة
ما ننشر أي معلومة عن مواقع سقوط الدانات العشوائية أو تحركات القوات. نشر المعلومات دي ممكن يعرض الناس للخطر.
لو شفت معلومات حساسة زي دي لازم تنبه الناس وتوعّيهم بخطورة نشرها.
في النهاية وسائل التواصل الاجتماعي أداة قوية جداً، لكن لازم نستخدمها بوعي وحذر خاصة في الظروف الصعبة زي الحروب.
