🇸🇩 السودان_الحنين :! 🖤🌎
قعدت عند ست الشاي طلبت قهوة ومنتظر تعملا لي ، جاء بتاع أورنيش لافي ، الزول القاعد جنبي وقّفو وقال ليه بتورنش بي ڪم ..؟
قال ليهو : بي 200جنيه ..
قال ليهو : أنا عندي 100بس ، تورنش لي ..؟
الولد طوالي نزّل شنطة عدّة الأورنيش وقعد في الأرض ، وطلّع شبشبو اللابسو عشان يديهو ليهو ويشيل منو جزمتو يورنشها ..
بصراحة .. أنا إستغربت لمّن قال ليهو 100جنيه وإستغربت أڪتر عشان الولد زاتو ما قعد يساوم ويفاصل في السعر ، وجاني فضول غريب إني أتابع الموقف وبقيت مراقبهم ..
أوّل تصرّف عملو الزول الڪان قاعد جنبنا بعد ما الولد أداهو الشبشب بتاعو ، لبسو وبعد شويّة رجّعو ليهو ..
الولد “بتاع الورنيش” إتحسس لمن رجع ليهو الشبشب ، وقال ليو : معليش شبشبي مقاسو صغير عليك ..
وبي إبتسامة قال للزول : عارف مقاسو صغير بس في النهاية بڪفّي الغرض عشان الشُرّابات بتاعتك نظيفة ما تتوسّخ بالتراب ..
الزول ردّ ليهو بإبتسامة مُتبادلة : أنا ما رجعتو ليك عشان ڪدا وﷲ ، بس أنا ما أحسن منّك عشان تقعد حفيان وأنا لابس شبشبك ..
الزول رجّع ليهو شبشبو وجرّ ليهو بنبر عشان يقوم من الأرض ويقعد جنبو في بنبر ويشتغل ..
الولد بتاع الورنيش قال ليهو : خليني قاعد في الواطة دي عشان لو قعدت في البنبر إلا أطلب حاجة أشربها ، عشان لو قعدت وجا زول يشرب حاجة حيمشي عشان مافي بنبر فاضي ..
الولد بتاع الورنيش حريص على إنو ما يقطع رزق ست الشاي ويشيل بنبر ساي ..
الزول قال ليهو : يازول ما حتقعد ساي ، عازمك أنا بس إنت أطلب الدايرو ..
الولد قال ليهو : وﷲ أنا لسّه حق الفطور ما طلعتو عشان ڪدا ما فطرت وما بقدر أشرب حاجة ..
وبڪل بساطة عفوية ..
الزول سيد الجزمة طوالي قام ومشى قطع الشَّارع حفيان للڪشك بتاع السندوتشات القصادنا ، إشترى سندوتشين ، أدّى الولد واحد وشال هو واحد ..
بقوا يتونسّوا مع بعض ويضحڪوا وطلب ليهو شاي لبن ..
تقريباً بعد نص ساعة غمت ليهو قروش في جيبو وطبعاً شڪلها(أڪتر من 1000جنيه) وقال ليهو : دي عشان أخّرتك من شغلك وجريت بيك زمن ..
الولد بتاع الورنيش عيونو رقرقتَ من معاملة الزبون دا ، ومشى وقف بعيد وڪل مرة يتلفت يعاين ليهو لحدي ما قطع الشارع ..
والموقف إنتهى وأنا فضلت قاعد في بنبري وسرحان ومنبهر من ڪمية الإيجابية الإتزرعت جواي وخلتني ما قادر أستوعب وعيوني مرقرقة ..🖤
نقلتو ليكم
… مجتمعنا الطيب وناسو الطيبين ..ربنا يحفظظكم وين م كنتو ويغطيكم ويرعاكم ويرد الغايبين ويرفع عن بلادنا الحبيبة البلاء وينصرا جندها بجند من عنده قادر يا الله يا كريم ٱمين
