مقالات الرأي
أخر الأخبار

ما تخربوا الموت بالرفس

ما تخربوا الموت بالرفس

بقلم/احمد صديق حمد

 

“ما تخربوا الموت بالرفس” مثل سوداني بنقولو للذبيحة البترفس بعد الذبح. والرفس ما برجع الروح، ولا بغير النتيجة، بس بخرب الموت.

 

ودي بالضبط حالة “صمود” وحزب البعث وباقي قوى الخارج اليوم.

 

هم عملوا العملة السيئة، والآن خايفين من نتيجتها، فقاموا يرفسوا.

 

عملوا شنو؟

ما قدموا غير الاتفاق الإطاري. والإطاري ما كان رؤية وطنية، كان هو السبب الأساسي للحرب. اتفاق مفصل على مقاس الخارج، برؤية خارجية هدفها تفكيك الجيش السوداني، ومساواتو بالمليشيا، وفرض وصاية مدنية مصنوعة في السفارات. كانوا دايرين جيش بلا هيبة ولا عقيدة، عشان البلد تفضل مفتوحة للنهب والتدخل.

 

ولا رؤية لمن كان بيقبض الثمن بالدولار وهو في قمة الجهاز التنفيذي للدولة.

 

الكان بياخد راتبو بالدولار من الخارج، ولاؤو للخارج. كانوا في السلطة ومعاهم كل شي: الدولة والمال والإعلام والدعم الدولي. عملوا شنو؟ لا إصلاح اقتصادي، ولا وقف للجوع، ولا بنوا مستشفى ولا مدرسة. بس قسموا البلد، ومكّنوا المليشيا، وسلموا القرار الوطني للخارج. فجا الإطاري، وجات الحرب.

 

واليوم بعد ما فعلوا فعلتهم، بقوا خايفين من النتيجة، فقاموا يرفسوا.

 

شبكة واحدة.. ما اجتماعات متفرقة

 

ولازم نربط الخيوط ببعض، لأنها ما اجتماعات متفرقة، بل شبكة واحدة، وخطة واحدة، وهدف واحد: دعم عودتهم للحكم عبر الخارج، بعد ما فقدوا الداخل.

 

اجتماع البعث بالمندوب الأمريكي في القاهرة، واجتماع “صمود” في أبوظبي، واجتماعاتهم في أديس أبابا ونيروبي وغيرها، كلها حلقات في سلسلة واحدة.

 

في القاهرة، البعث بسلم المندوب الأمريكي مذكرة من سبعة محاور، ويظن بيها إنو ممكن يرجع يحكم السودان تاني. يظن إنو مجرد الجلوس مع الأمريكي، وتسليم ورقة مكتوبة في الخارج، كافي يرجعو للسلطة، وكأن السودان بيتحكم من القاهرة وواشنطن، ما من الخرطوم وإرادة شعبو.

 

وفي أبوظبي، بيجتمع حمدوك وبرمة ناصر وطه الحسين والهادي إدريس، عند الداعم الأكبر للمليشيا، الداعم الصرف المليارات طمعاً في امتلاك السودان.

 

وفي كل عاصمة، نفس الوجوه، نفس الخطاب، نفس المطالب: وقف الحرب لإنقاذ المليشيا، وإقصاء الإسلاميين والقوى الوطنية، وفرض أنفسهم كبديل، بضغط أجنبي.

 

هم ما بيجتمعوا مع الأجانب عشان يخدموا السودان، بل بيجتمعوا مع الأجانب عشان الأجانب يخدموهم في العودة. بيفتشوا عن مكون أجنبي يدعمهم: مرة أمريكي، ومرة إماراتي، ومرة أممي، ومرة منظمة، ومرة سفارة. بيتنقلوا من كفيل لكفيل، ومن داعم لداعم، لأنهم ما عندهم داعم واحد في الداخل.

 

ده هو الربط الحقيقي: صمود وباقي الأحزاب، والبعث، وكل وكلاء الخارج، بيتحركوا كجسم واحد، بمكونات أجنبية متعددة، لهدف واحد: أن يعودوا للحكم على ظهر الخارج، بعد ما طردهم الداخل.

 

بيظنوا إنو الأمريكي حينفذ ليهم الإقصاء، وإنو الإماراتي حيمول ليهم العودة، وإنو الأممي حيشرعن ليهم السلطة. خاب ظنكم. فالأجنبي نفسو لاحظ فشلكم، وشاف إنكم بلا قاعدة، بلا شارع، بلا رؤية، بلا قدرة تقدموا أي شي للشعب السوداني غير الكلام والمذكرات.

 

وفي نفس المذكرات البسلموها للمندوب الأمريكي وغيرو، بيطالبوا باستبعاد المؤتمر الوطني والحركة الإسلامية وواجهاتهما من العملية السياسية. ياتو سلام ده البيبدأ بالإقصاء؟ كيف تدّعي الديمقراطية وانت بتمنع ملايين السودانيين من حقهم كمواطنين؟ كأن الإسلاميين ما سودانيين، وكأنكم انتو وحدكم من يحق ليهو يحكم. هم ما دايرين دولة مواطنة، بل دولة على مقاسهم وحدهم.

 

والدليل على خواء فكرهم: الحوار السوداني – السوداني.

 

لو كانت ليكم رؤية لكنتوا شاركتوا في الحوار السوداني – السوداني. لو كان عندكم مشروع لكنتوا جلستوا مع إخوانكم داخل السودان بلا وصاية وبلا شروط إقصائية. لكن لخواء فكركم امتنعتوا، وهربتوا، وقاطعتوا. لأن الحوار الحقيقي بيكشفكم: فيهو ما بتنفع المذكرات المكتوبة في الخارج، ولا الشعارات المستوردة، ولا الدولار. فيهو بيتسئل: أين كنتم؟ وماذا قدمتم؟

 

فضلتوا الجلوس مع المندوب الأمريكي في القاهرة، والجلوس مع الكفيل في أبوظبي، على الجلوس مع أهلكم في السودان. لأن الخارج بيديكم المنصة والبيان، بينما الداخل حيسألكم السؤال الصعب.

 

اجتماع أبوظبي.. تبرم الكفيل من وكلائه

 

وانكشف المستور في اجتماع أبوظبي الجمع حمدوك وبرمة ناصر وطه الحسين والهادي إدريس.

 

أبوظبي هي الداعم الأكبر للمليشيا. صرفت المليارات، وسلحت، ومولت، طمعاً في امتلاك السودان. ظنت إنو المليشيا حتحسم المعركة في أيام، وإنو وكلاءها حيستلموا السلطة.

 

لكن المليشيا فشلت في الثبات في الميدان، وانكسرت أمام الجيش والتفاف الشعب حولو. فجا التبرم والضيق في أبوظبي. شعر الكفيل إنو صرف بلا نتيجة، وإنو وكلاءه فشلوا سياسياً وإعلامياً، وفشلوا في توفير الغطاء للمليشيا. فكان الاجتماع أشبه بجلسة محاسبة: أين ذهبت الأموال؟ لماذا فشل المشروع؟

 

وبات هؤلاء مهددين بالطرد والتهميش. فالكفيل لا يرحم الوكيل الفاشل. ده هو مصير من باع وطنو: يبدأ مدللاً في فنادق أبوظبي، وينتهي متبرماً منو حتى من دفع ليهو.

 

هؤلاء دايرين وقف الحرب ما رحمة بالمدنيين، بل إنقاذاً للمليشيا بعد انكسارها، وإبقاءها قوة سياسية، وإقصاء الجيش والقوى الوطنية، والعودة للسلطة على ظهر الضغط الأجنبي.

 

نقولها بوضوح: خاب ظنكم.

 

لن يعود من فشل قبل الحرب ليحكم بعدها. ولن يقبل الشعب بإقصاء أي مكون سوداني، إسلامي أو غيرو. فالسودان للجميع، والحل سوداني خالص، لا يُفرض من أبوظبي ولا من القاهرة ولا من أي عاصمة.

 

درب الرجوع بقى مستحيل

 

نعم، درب الرجوع بقى مستحيل. مستحيل لأن الشعب عرفكم. مستحيل لأن الجيش صمد وانتصر. مستحيل لأن المليشيا انكسرت. مستحيل لأن كفيلكم في أبوظبي اتبرم منكم. مستحيل لأن الأمريكي نفسو لاحظ فشلكم. مستحيل لأنكم هربتوا من الحوار السوداني – السوداني، واخترتوا الخارج على الداخل.

 

كنتوا بتظنوا إنو درب الرجوع حيكون عبر القاهرة وأبوظبي وواشنطن. لكن كل تلك الدروب اتقفلت. فالدرب الوحيد للعودة كان عبر الشعب السوداني، وانتو قطعتوهو بأيديكم يوم اخترتوا الاتفاق الإطاري، ويوم اخترتوا الدولار على الوطن، ويوم اخترتوا المليشيا على الجيش.

 

لا رؤية لمن قبض الثمن بالدولار، ولا سلام ممن صنع الحرب بالإطاري، وما تخربوا الموت بالرفس.. فقد فعلتم فعلتكم السيئة، والآن أنتم خائفون من نتيجتها، وترفسون بلا فائدة، مرة باجتماع البعث مع المندوب الأمريكي في القاهرة، ومرة باجتماع أبوظبي محاسبة من الكفيل، ومرة بكل اجتماعاتكم الخارجية مع مكونات أجنبية لدعم عودتكم، لكن درب الرجوع بقى مستحيل، بعد أن التف الشعب حول جيشه، وتبرم منكم كفيلكم بعد أن فشل مشروعه رغم كل ما قدمه من دعم

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى